Gipahimutang ug naserbisyohan sa Bureau of Fire Protection (BFP) Bukidnon ang isyu sa kakulangan sa panubig nga nasinati sa mga delegado sa NMRAA 2026, nga natapos kagahapong adlawa sa probinsya sa Bukidnon.
Sa pakighinabi sa Bombo Radyo Malaybalay kay SFO2 Reny R. Rubillos, Officer-In-Charge sa Fire Safety Enforcement sa BFP Bukidnon, na matod pa naserbisyohan ang panginahanglan sa tubig sa mga billeting quarters, ilabina sa adlaw-adlaw nga gamit sama sa pagkaligo, pagluto ug uban pa.
Bisan pa sa pagsugod sa ting-init, wala nagkulang ang suplay tungod sa kooperasyon sa Malaybalay Water District ug Prime Water nga nagbukas sa ilang water sources alang sa water rationing. Gitabangan usab kini sa alternatibong tinubdan sa Lantapan, Sumilao ug Impasug-ong, lakip ang libre nga tubig gikan sa usa ka refilling station sa Bangcud.
Gibutyag ni Rubillos nga adunay gamayng kakulangan sa unang adlaw tungod sa wala pa maplastar nga deployment sa mga fire trucks, apan dali kining nasulbad pinaagi sa pag-adjust sa distribusyon base sa panginahanglan sa matag billeting quarter.
Sa kinatibuk-an, giila sa BFP nga malampuson ang ilang operasyon sa water rationing, uban sa pasalamat sa DepEd ug ubang ahensya nga mitabang aron masiguro ang kaayohan sa tanang delegado.