Nidaog sa bag-ong nahuman nga eleksyon si kanhi Presidente Rodrigo Roa Duterte isip Mayor sa Dakbayan sa Davao, bisan pa sa kasamtangang kasong crimes against humanity nga iyang giatubang sa International Criminal Court (ICC) sa The Hague, Netherlands.
Bisan pa nga anaa siya sa kustodiya sa ICC tungod sa mga alegasyon nga seryosong paglapas sa tawhanong katungod atol sa iyang kampanya kontra droga, midaug gihapon siya sa suporta sa katawhan sa Davao City ug napili pag-usab isip ilang mayor. Sumala ni Atty. Orly Vicente Montalban, usa ka law practitioner, nga kini nga sitwasyon usa ka legal nga komplikado ug dili kasagaran mahitabo.
Pasabot ni Atty. Montalban, hangtod walay final conviction gikan sa korte, aduna gihapon siyay legal nga kapasidad nga modagan ug modaug sa eleksyon.Gisaysay pa ni Atty. Montalban nga samtang legal nga dili pa siya convicted, ang physical absence ni Duterte mahimo og babag sa iyang aktwal nga pagserbisyo sa posisyon. Dugang pa ni Atty. Montalban, kon magpabilin siya sa The Hague, praktikalmente dili siya makabuhat sa iyang obligasyon isip mayor.
Ang DILG (Department of the Interior and Local Government) ug ang Comelec mahimo nga manghilabot ug magdesisyon kung kinahanglan ba siyang suspensuhon o ipuli-an sa temporaryo nga mayor. Dugang pa niya, ang ICC dili mopugos og pagpahilom sa political rights sa usa ka tawo kung wala pa’y pinal nga desisyon. Apan sa aktwal nga operasyon sa gobyerno, mahimo gayud nga mogikan og legal ug administratibong desisyon ang mga ahensya sa Pilipinas kung magpadayon ba siya o dili sa posisyon.
Ingun pa ni Atty. Montalban, ang balaod wala magdili nga modagan ka bisan naa ka’y kaso, pero kung dili na nimo matuman ang imong katungdanan tungod kay naa ka sa gawas sa nasud ug sa kustodiya, kana na usa ka isyu sa governance ug serbisyo publiko. Sa pagkakaron, nagtan-aw ang publiko sa mosunod nga mga lakang gikan sa gobyerno lokal ug nasyonal bahin sa kahimtang sa bag-ong napiling mayor nga si Rodrigo Duterte.