Gipaabot pa ning kasamtangan ang tubag ni Bise-Presidente Sara Duterte gumikan wala pa gihapon kini kumpirmadong pahibalo gikan sa kampo niini kung motambong ba kini o dili sa House Committee on Justice impeachment hearing nga gikatakda ugma, Myerkules, Marso 25, 2026.
Matud ni Bicol Saro Rep. Terry Ridon, nagpabilin nga wala’y opisyal nga tubag gikan sa buhatan bisan pa ug pormal na kining giimbitar sa Kamara aron personal nga motubag sa mga alegasyon batok kaniya.
Giandam na usab sa House Committee on Justice ang hearing bisan unsa pa ang mahitabo, ug gipakita sa mga mambabalaod nga magpadayon ang proseso kung motambong man kini o dili.
Sa maong hearing, gilauman ang presentasyon sa mga ebidensya ug posibleng pagpaminaw sa mga testigo kalabot sa mga reklamo nga naglakip sa isyu sa confidential funds ug alegasyon sa pag-abuso sa gahum.
Matud pa ni Deputy Speaker Paolo Ortega V, nga importanteng motambong si VP Duterte aron tubagon ang mga pasangil kabahin matud pa kini sa responsibilidad ubos sa Konstitusyon.
Samtang sumala usab sa House panel, ang impeachment proceedings dili usa ka bug-os nga pagsulay apan usa ka pagsusi sa mga ebidensya ug testimonya aron mahibal-an kung adunay igong basehanan ang reklamo sa pagpadayon.