Nagpagula og seryosong hulga si US President Donald Trump batok sa Iran diin gihatagan niya ang Tehran og duha ka adlaw aron pabalikon ang pag-abli sa Strait of Hormuz, kay kon dili, pulpugon sa Amerika ang ilang mga planta sa kuryente.
Sa iyang post sa Truth Social, gipaniguro ni Trump nga dugmokon sa militar sa Amerika ang mga “power grid” sa Iran, sugod sa kinadak-an, kon dili tugotan ang hingpit nga pag-agi sa mga barko sulod sa 48 oras.
Kini nga tensyon naggumikan sa gihimong “blockade” o pagbabag sa Iran sa maong kipot, diin moagi ang 20 porsyento sa lana sa tibuok kalibutan. Tungod niini, misaka ang presyo sa lana ngadto sa kapin $100 matag baril.
Isip bawos, nagpasidaan usab ang militar sa Iran nga targeton nila ang mga imprastraktura sa enerhiya ug “desalination” (planta sa tubig) sa Amerika sa maong rehiyon kon ipadayon ni Trump ang iyang hulga.
Bisan pa sa pagsaka sa presyo sa krudo ug mga palitonon, gipakagamay lang ni Trump ang estratehikong bili sa Strait of Hormuz alang sa US ug miingon nga ang taas nga presyo sa lana usa lang ka “gamay nga sakripisyo” alang sa seguridad sa kalibutan.
Sa ikatulo nga semana sa gubat nga gilunsad sa US ug Israel, mikabat na sa kapin 1,500 ang namatay sa habig sa Iran samtang 13 naman ang nakalas sa mga sundalong Amerikano.