Nagbukas og posibilidad ang nasud sa Iran nga tugotan na ang mga barko nga konektado sa Japan nga makalabay sa Strait of Hormuz, usa ka kritikal nga ruta sa lana sa tibuok kalibutan.
Sumala sa taho, gibutyag ni Iranian Foreign Minister Abbas Araghchi nga andam ang ilang kagamhanan nga makigtambayayong sa Tokyo aron masiguro ang luwas nga pag-agi sa mga Japanese vessels. Kini usa ka mahinungdanong lakang alang sa Japan tungod kay 90% sa ilang suplay sa lana nagaagi sa maong dapit.
Sa pagkakaron, gipatuman sa Iran ang gitawag nga “selective blockade” o pinili nga pag-ali sa maong agianan taliwala sa nagpadayong tensyon batok sa Estados Unidos ug Israel. Giklaro ni Araghchi nga ang maong ruta sirado lamang alang sa ilang mga “kaaway” o kadtong mga nasud nga miatake kanila, apan abli kini alang sa ubang mga nasud nga makig-alayon kanila.
Gilauman nga ang maong desisyon makatabang sa pagpakunhod sa kakuwang sa suplay sa enerhiya sa Japan ug sa pag-stabilize sa presyo sa lana sa merkado.