Gilauman sa sektor sa ekonomiya ang bug-at nga pagsaka sa presyo sa mga palaliton gumikan sa tumang pagsaka usab sa presyo sa lana nunot sa nagpadayon nga kagubot sa Middle East.
Sa ka pakighinabi sa Bombo , gipahayag ni Ray Talimio Jr., ang kanhi Chairman sa Oro Chamber ug miyembro sa Economic Development Committee sa RDC-X, nga ang padayon nga pagsaka sa presyo sa lana maghatag og “domino effect” sa ekonomiya.
Matud niini, dili lamang ang sektor sa transportasyon ang maigo niini, kun dili lakip na ang presyo sa mga raw materials ug logistics nga moresulta sa pagmahal sa mga nag-unang palaliton.
Hugot usab nga gipahimanuan sa ekonomista ang publiko sa pagsagop og mga pamaagi aron makadaginot taliwala sa nasinating krisis sa ekonomiya sa panahaon karun.
Gitumbok niini nga dili lamang ang mga negosyante ang apektado kondili ang tanang sektor sa katilingban tungod sa global nga krisis.
Gipasiugda usab ni Talimio nga kini nga sitwasyon dili kontrolado ug lisod matagna kon kanus-a matapos, hinungdan nga gikinahanglan ang tagsa-tagsa nga estratehiya sa matag pamilya.
Giawhag ni Talimio ang katawhan nga magdaginot sa pagkonsumo ug sa paggamit sa bisan unsa nga anaa nga mga kahimuan aron maminusan ang epekto sa krisis sa inadlaw-adlaw nga panginabuhian.