Nakabsan sa kinabuhi ang duha ka indibidwal atol sa insidenteng pagpamusil sa lalawigan sa Bukidnon.
Gikatahong saa lungsod sa Quezon, adunay usa ka 42-anyos nga babaye nga gitago sa pangalang alias “Jeniffer” ang namatay human pusila sa iyang kalive-in partner nga si alias “Badong” 30 anyos.
Sumala sa imbestigasyon, gikan ang biktima ug suspect sa merkado ug nagsakay sa motorsiklo padulong sa ilang panimalay sa Purok 2, Libertad.
Apan matud pa sa usa ka witness nga anaa na sila duol sa ilang panimalay, gikaingong nakita niini nga naglalis ang duha hangtod kalit nga mihunong ang suspek ug gihulbot ang armas gikan sa sling bag ug gipusil ang biktima sa ulo.
Samtang dali nga miikyas ang suspetsado paingon sa katubhan.
Gikataho nga walay basiyo sa bala ug uban pang ebidensya ang nakuha sa crime scene hinungdan nga padayon ang imbestigasyon ug pagpangita sa kapulisan sa maong suspek pinaagi sa hot pursuit operation.
Samtang sa Maramag, usa ka 51-anyos nga lalaki nga gitago sa pangalang alias “Berto” ang patay human makadawat og daghang samad pinusilan ug dinunggaban sa lawas.
Gikatahong nakita nga nag-inom ang buktima sa usa ka tindahan sa Dologon. Apan pasado 7 sa gabii, nadungog sa mga silingan niini nga nagsinggit kini ug sa pipila ka minuto nadungog usab ang duha ka buto sa pusil.
Human sa pipila ka minuto, nakaplagan kini nga naghigda na atubangan sa usa ka balay ug naligo sa kaugalingong dugo.
Dali kining gidala sa balay tambalanan apan gideklarang dead-on-arrival.
Kasamtangang padayon ang imbestigasyon sa kapulisan kabahin sa duha ka kaso sa pagpamusil aron mailhan ug madakpan ang responsable.
Gi-awhag usab sa mga otoridad ang katawhan nga magpabilin nga mabinantayon ug dayon mopahibalo kung adunay masuspetsahang kalihokan sa ilang palibot aron malikayan ang susamang panghitabo.