Gahulat na lamang sa pag-apruba gikan sa Office of the Civil Defense (OCD)ang Provincial Disaster Risk Reduction and Management Office (PDRRMO) sa Bukidnon aron ma-deploy sa Bogo City, Cebu, nga grabe ang kadaot human sa 6.9 magnitude nga linog nga nahitabo ug miresulta sa kamatayon sa pipila ka mga indibidwal.
Sa eksklusibong pakighinabi sa Bombo Radyo Malaybalay, Bukidnon atol sa programang Zona Libre kay Anecito Torayno Jr., Operations Chief sa Bukidnon Provincial Risk Reduction and Management Office, iyang gibutyag nga 12 ka mga personahe sa PDRRMO ang nakastandby karon alang sa posibleng deployment.
Tahas sa grupo ang pagtambong sa search and retrieval operations sa apektadong mga lugar sa Cebu. Saysay pa ni Torayno, kompleto na ang ilang mga ekipo lakip na ang rescue vehicle nga gamiton kon makadawat sila og mando sa operasyon.
Apan matud pa sa taho gikan sa Cebu, pipila na ka mga indibidwal ang narecover ug posible nga gamay na lang ang wala pa makit-i.
Gihisgutan usab nga ubay-ubay na ang mga grupo nga naa sa Cebu karon ug mitabang na sa mga kalihokan sa pagpangita ug pagluwas.
Gipadayag ni Torayno nga kon mandoan sila sa OCD nga dili na ipadayon ang deployment ilang tumanon ang mando subay sa koordinasyon ug mandato sa ahensiya.