Gihimakak ni Bise Presidente Sara Duterte nga nakadawat og mando si Cavite 4th District Representative Francisco “Kiko” Barzaga gikan sa iyang pamilya kabahin sa alegasyon nga ipapakanaog sa katungdandan si Pangulong Ferdinand Marcos Jr.
Matud sa bise presidente, walay nada ang maong pasangil ug usa napud ka pamaagi sa paglambigit sa iyang pangalan.
Gidugang pa niini nga nga si Barzaga adunay kaugalingong hunahuna, prinsipyo, ug kagawasan sa pagpahayag sa iyang panglantaw, ug walay daotan sa iyang gihimong protesta batok sa korapsyon sa Forbes Park, Makati City niadtong Oktubre 10, diin mikabat sa kapin 300 ka tawo ang mitambong.
Dugang pa, gibatikos usab sa Bise Presidente Sara Duterte ang pagbalik sa daang kaso nga gihimo sa Office of the Ombudsman ug iyang gipunto nga usa lamang kini ka porma sa pagpamulitika.
Matud sa bise presidente, klaro kini nga klase sa pamumulitika ang hinungdan sa pag-usab sa imbestigasyon batok kaniya ug sa iyang pamilya.
Gisulti niini nga inay nga magpokus ang mga opisyal sa pagserbisyo sa katawhan, gigamit ang gahum sa politika aron dunggaban ang ilang ngalan. Iyang gipahayag nga dili siya mahadlok sa bisan unsang imbestigasyon tungod kay limpyo kuno ang iyang konsensya ug walay sala nga nabuhat.
Ang tinuod nga serbisyo dili mahadlok sa pamulitika, matud pa sa Bise Presidente.
Sa laing bahin, gisaway ni Presidential Communications Undersecretary Claire Castro ang mga pamahayag ni Duterte nga buot matud pa ni Marcos magpabilin sa gahum ug katungdanan.
Matud ni Castro, “Puro istorya, puro akusasyon, walay ebidensya, ug walay pulos,” ang mga tirada sa bise presidente ug gidepensahan niini ang administrasyon nga aktibong nakigbatok sa korapsyon.
Samtang kabahin niini, nagpugong sa pagkomento si Bise Presidente Duterte kalabot sa desisyon sa International Criminal Court kon (ICC) nga nagdumidili sa interim release sa iyang amahan nga si kanhi presidente Rodrigo Duterte.
Saysay sa bise presidente, nga mas maayong maghulat na lamang sa resulta aron usa ra ang ipagawas nga pamahayag niini.
Taliwala sa maong panagbangi, kahinumduman nga nagkomedya si Bise Presidente Sara Duterte sa iyang pakigpulong sa media atol sa Office of the Vice President (OVP) press briefing kagahapong adlawa.
Nagbinuang kini og sulti nga gamiton unta sa mga media ang iyang nindot nga hulagway sa mga balitang ipang-post, ug nagpasiaw og mando sa iyang staff nga padalhan ang mga mamamahayag og gwapa nga pictures niini.
Matud pa niini, nindot ang mga litrato sa iyang mga kalaban, apan sa tinuod, mas gwapa man siya tandi kanila, isip komedya.
Ang maong pamahayag naghatag og kahuhapay ug katawa sa mga mitambong human namatikdan niini ang kalainan o deperensya sa iyang mga hulagway nga ipagawas sa media.