Nagtingkagol na sa selda sa kapulisan ang giilang Top 9 Most Wanted Person sa regional level human malampusong nasikop sa gikasang operasyon sa Purok 2, Barangay Labuagon, Kibawe, Bukidnon kaganihang alas 10:04 sa buntag, Abril 9, 2026.
Giila sa mga otoridad ang dinakpan nga si Randy Cabrera Paran, 38-anyos, minyo, mag-uuma, ug residente sa maong dapit. Nasikop ang suspek pinaagi sa warrant of arrest alang sa kasong murder ubos sa Criminal Case No. 47890-26 nga gipagawas niadtong Abril 7, 2026. Walay girekomendar nga piyansa ang korte alang sa iyang temporaryong kagawasan.
Ang maong malampusong operasyon gipahigayon sa mga sakop sa Kibawe Municipal Police Station ubos sa pagpanguna ni PCPT Leonila R. Vicente, kauban ang Bukidnon 2nd Provincial Mobile Force Company (PMFC), Bukidnon Provincial Intelligence Team, Regional Intelligence Unit 10, Regional Investigation and Detective Management Division, ug 1003rd Mobile Company RMFB 10, sa koordinasyon sa Bukidnon Intelligence Unit.
Sa pagkakaron, ang dinakpan anaa na sa kustodiya sa Kibawe MPS alang sa saktong dokumentasyon ug tukmang disposisyon. Kini nga operasyon giisip nga usa ka dakong kalampusan sa nagpadayon nga kampanya sa kapulisan batok sa mga pugante ug labing wanted nga mga indibidwal sa tibuok rehiyon.