Nag-atubang og kasong homicide ang usa ka 68 anyos nga senior citizen nga giilang si Antonio Digenion, residente sa Purok 6, Barangay Zamboanguita, Malaybalay City, human niining gitigbas patay ang iyang kauban sa inom.
Giila ang biktima nga si Eduardo Fernando Montero, 45 anyos, residente sa Quezon, Bukidnon.
Sa eksklusibong pakighinabi sa Bombo Radyo Malaybalay, gibutyag ni Digenion, nga niadtong adlawa, miabot si Montero sa iyang panimalay nga daang langgo sa ilimnong makahubog ug nanghagad usab og inom.
Human sa pipila ka pagtagay, mibalibad na si Digenion tungod aduna pa kini trabaho sunod adlaw.
Milakaw na matud pa si Montero apan mibalik kini og nagdala ang sundang ug gitigbas ang lingkoranan ug haligi sa balay sa suspek.
Gisulayan pa ni Digenion nga pasabton ang biktima, apan gisiko lamang kini.
Sa kahadlok sa iyang kaluwasan natigbasan niini si Montero sa liog, lawas, ug nawong, nga miresulta sa kamatayon niini.
Nagpasabot usab ang 68 anyos nga suspek sa publiko ug sa pamilya sa biktima nga wala kini tumong nga patyon si Montero.
Sa pagkakaron, anaa na sa kustodiya sa Malaybalay CPS si Digenion samtang naghulat sa pormal nga pagpasaka sa kaso batok kaniya.
Kahinumdoman nga nahitabo ang insidente alas 11:30 sa milabayng adlaw.