Gipanghimakak ni Senador Bong Go ang koneksyon sa magtiayong Curlee ug Sara Discaya, og gisalikway usab nga nalambigit kini sa anomalya sa mga proyekto sa gobyerno.
Ang pamahayag sa senador misunod human isulti ni Department of Public Works and Highways (DPWH) Secretary Vince Dizon nga gipasakaan na ug imbestigasyon sa iyang opisina ug sa Ombudsman ang posibleng kalambigitan sa mga Discaya sa CLTG Builders usa ka kumpanya nga nakabase sa Davao City nga giingong gipanag-iyahan sa amahan ni Go.
Matud ni Go nga gitarget siya kalabot sa imbestigasyon sa giingong anomalya sa flood control projects.
Dugang pa niini, wala siya mahadlok gumikan wala siya’y gibuhat nga sayop, ug kauban siya sa mga Pilipino sa pakigbisog batok sa korapsyon.
Dugang pa sa senador nga ginalikay ang katawhan sa kamatuoran og gahatag og kalibog imbes nga pangitaon ang “buwaya” ug “mastermind” sa likod sa giingong korapsyon sa mga infrastructure projects.
Nagpahayag usab si Go nga andam sya nga mahimong complainant ug mangusog nga pasakaan og kaso ang mga nalambigit sa mga anomalya o substandard nga proyekto, bisan pa parente niya kini.
Dugang pa, nga importante kaniya nga manubag ang mga nalambigit sa maong anomalya.