Gipadayag ni kanhi House Speaker ug Leyte Representative Martin Romualdez nga andam siyang ipakita ang iyang Statement of Assets, Liabilities, and Net Worth (SALN) kon kini pangayoon sa Independent Commission for Infrastructure (ICI) isip kabahin sa imbestigasyon sa maanomalyang mga proyekto sa flood control.
Gipanghimakak usab ni Romualdez ang mga pasangil nga adunay naghatod og mga maleta nga puno sa kuwarta sa iyang balay, ug mitino nga wala siyay gitagoan ug andam siyang makigkollaborar sa imbestigasyon.
Kini ang unang higayon nga mitunga si Romualdez sa pagdungog sa ICI kalabot sa mga kuwestyonableng proyekto sa flood control.
Sumala ni ICI spokesperson Atty. Brian Keith Hosaka, dako kini’g lakang aron masabtan ang papel sa mga mambabalaod sa pag-apruba sa pondo alang sa maong mga proyekto.
Dugang pa ni Hosaka, adunay pipila ka mga ngalan nga gihisgutan ni Romualdez nga posible usab nilang imbitahan sa sunod nga mga pagdungog.
Giklaro usab ni Hosaka nga gipanghimakak ni Romualdez ang tanang pasangil nga naggikan sa mga miaging pagdungog sa Senado ug Kamara.
Sa pagkakaron, boluntaryo nga nagsumite si Romualdez og affidavit sa komisyon nga kasamtangan pa nilang ginarebyu, ug gilauman nga ipatawag pag-usab siya sa sunod nga hearing.