Gikastigo ni Batangas 2nd District Representative Gerville Luistro ang contractor nga si Pacifico “Curlee” Discaya II tungod sa iyang gitawag nga “selective amnesia” o pinili nga pagkalimot sa mga importante nga detalye atol sa pagdungog sa House Committee on Infrastructure.
Gipahayag ni Luistro ang iyang pagkadismaya sa paglimot ni Discaya sa mga ngalan sa mga opisyal nga nalambigit sa korapsyon sa miaging administrasyon.
Matud ni Discaya nga adunay pipila ka opisyal sa gobyerno nga nangayo og “kickback”, lakip na sa panahon pa sa Duterte administration.
Apan, mibalibad kini sa pagngalan sa mga nalambigit nga mga opisyal.
Kini nga pagdumili ni Discaya maoy nakahatag og kritisismo gikan kang Representative Luistro.
Gipasabot ni Luistro nga sa Senado, nakahimo na si Discaya sa pagtumbok sa mga kongresista ug mga opisyal sa Department of Public Works and Highways (DPWH) nga nalambigit sa maanomalyang flood control projects.
Dugang pa niini, nagsumite pa siya og affidavit isip ebidensya sa iyang mga alegasyon.
Sa pikas bahin , ang Discaya Group of Construction Companies nakadawat og kontrata gikan sa gobyerno nga nagkantidad og P12 bilyon sa miaging administrasyon.
Tungod niini, gikuwestiyon ni Luistro ang pagkalimot ni Discaya sa mga ngalan sa mga indibidwal nga nalambigit sa mga anomalya tali sa tuig 2016 hangtod 2022.
Ang dako nga kantidad sa kontrata nga nakuha sa kompanya ni Discaya maoy naghatag kang Luistro nga magduhaduha sa sinseridad niini sa paghatag og tinuod nga impormasyon.