Pres. Marcos Jr. padayon sa pagpangita og alternatibong suplay sa lana taliwala sa tensyon sa Middle East

Gibutyag ni Pres. Ferdinand  Bongbong Marcos nga  nagpadayon ang Pilipinas sa pagpangita og laing mga nasod nga posibleng makuhaan og lana taliwala sa tensyon sa Middle East.

Gisiguro usab sa Presidente nga adunay igong suplay sa lana ang nasod ug aduna pay gipaabot nga nga lana sa mosunod nga mga semana.

Giila sa Presidente nga ang dakong hagit karon mao ang kawalay kasegurohan kon kanus-a matapos ang kagubot sa Middle East, nga maoy nag-unang hinungdan sa pagsaka sa presyo sa lana sa merkado sa kalibutan.

Matud sa Presidente, lisod matagna ang dagan sa presyo, apan gipaniguro niya nga kon adunay makuptan nga klarong banabana sa pagtaas niini, mas makapangandam ang nasod sa epekto niini sa ekonomiya ug sa katawhan.