Gihatagan ang Pantawid Pamilyang Pilipino Program 4Ps og pundo nga nagkantidad og kapin sa P112.9 bilyones ubos sa proposed 2026 national budget.
Apan, gikumpirma ni Budget Secretary Amenah Pangandaman, nga walay alokasyon alang sa Ayuda sa Kapos ang Kita Program kon AKAP ubos sa 2026 National Expenditure Program o NEP.
Ang AKAP gihatag ngadto sa mga minimum-wage earner diin nakamugna kini og kontrobersiya tungod gihatagan kini og alokasyon sa 2025 national budget nga nagkantidad og P26 bilyon.
Matud ni Pangandaman, nga aduna pay nahabilin nga pondo sa 2025 national budget.
Dugang pa niini, nga limitado ang fiscal space hinungdan nga wala nila ilakip ang AKAP sa gihatagan og pondo.
Gipasabot usab sa kalihim, nga ang orihinal nga kinatibuk-ang budget proposals gikan sa mga ahensya mokapin sa diyes trilyon ka pesos apan dili tanan niini naaprobahan.
Samtang miluwat usab si House Committee on Appropriations Chairperson Mikaela Suansing, nga wala pa mahisgoti sa Kamara ang AKAP apan ila kining ibase sa gipasa nga NEP.
Gidepensahan usab ni Suansing ang AKAP ug gihingusgan nga dako kini og natabang sa katawhan hilabi na niadtong wala nalakip sa Assistance to Individuals in Crisis Situations o AICS ug mga minimum wage earners.
Sa Budget message ni Presidente Marcos, ang TUPAD kon “Tulong Panghanapbuhay sa Ating Disadvantage Workers Program” gihatagan og alokasyon nga P11 bilyon samtang ang Department of Labor and Employment Integrated Livelihood Program gisugyot nga makadawat og P2.2 bilyon nga budget.
Gidepensahan sa Presidente ang pundo nga gigahin sa 4Ps tungod makatabang matud pa kini sa paghatag ug dekalidad nga pagkaon sa mga 4.4 milyones ka marginalized household beneficiaries.
Lakip sa mga hinabang nga ihatag mao ang cash grants, rice subsidy, enhanced support services intervention grants, cash grants alang sa unang 1000 ka adlaw nga health monitoring sa panahon sa pagmabdos hangtod nga ang bata magduha ka tuig.