Gisugyot sa mga senador ang across-the-board cut o parehas nga pagkunhod sa pondo sa tanang proyekto sa Department of Public Works and Highways (DPWH) para sa tuig 2026, human masuta ang sistematikong overpricing sa pipila ka proyekto sa maong ahensya nga may kalabotan sa mga isyu sa korapsyon.
Gipadayag nila Senadora Loren Legarda ug Senador Bam Aquino ang maong sugyot atol sa pagsusi sa gisugyot nga budget sa DPWH para sa 2026.
Gipangutana ni Legarda si Public Works Secretary Vince Dizon kung makatarungan bang ipatuman ang 25 hangtod 30 porsyento nga pagkunhod sa tanang infrastructure line items sa DPWH.
Matod pa ni Legarda, mahimo kining isip temporary corrective measure alang sa 2026 budget, aron ang pondo nga ipang-apod-apod alang sa 2027 mahimong mas “scientific” o ibase sa aktwal nga datos.
Giangkon ni DPWH Secretary Vince Dizon nga adunay pipila ka proyekto sa DPWH nga misubra og labaw sa 20 porsiyento sa husto nga presyo.
Apan, imbes nga magpatuman og across-the-board cut, mas maayo nga targeted adjustment o pag-usab base sa aktuwal nga presyo sa matag rehiyon ang buhaton.
Gipunting ni Senador Bam Aquino, nga mahimong makatarunganon ang across-the-board cut kung wala gihapoy makita nga kausaban sa DPWH sa pagtubag sa isyu sa overpricing.
Sumala pa ni Senador Aquino, kaniadto pa niya gihangyo si kanhing DPWH Secretary Manuel Bonoan nga isumite pag-usab ang listahan sa mga proyekto ug ang presyo niini aron matul-id ang mga overpriced items.