Nanawagan si House Deputy Minority Leader og Mamamayang Liberal Partylist Representative Leila de Lima kang Pangulo Ferdinand Marcos Jr. nga himoon nga live o ipakita sa publiko ang tanang pagdungog sa Independent Commission for Infrastructure (ICI) kalabot sa mga proyektong pang-kontrol sa baha nga adunay giingong anomalya.
Matud ni De Lima, kinahanglan nga transparent ang gobyerno aron ipakita sa katawhan ang tinuod nga proseso sa imbestigasyon ug aron masiguro nga wala gitago ang komisyon sa mga resulta niini.
Samtang, gidugang usab ni Rep. Mark Anthony Santos sa Las Piñas nga katungod sa publiko nga mahibalo sa kompletong detalye sa imbestigasyon, ilabi na kay bilyon-bilyon nga pondo sa katawhan ang nalambigit sa maong isyu.
Sumala pa ni Santos, pinaagi sa live streaming, makita sa mga katawhan kinsa ang nagsulti sa tinuod ug malikayan ang pagpanalipod o pamulitika sa proseso.
Dugang pa sa mambabalaod, ang transparency dili lamang usa ka saad, kondili usa ka obligasyon, labi na kon adunay dakong isyu sa korapsyon.