Tungod sa palpak nga serbisyo sa Primewater sa dakbayan sa Malaybalay gusto ni City Mayor Jay Warren Pabillan nga papahawaon ang kompaniya gikan sa syudad kay padayon ang mga residente sa pagantos sa kakulang sa tubig.
Matud sa alkalde, wala matubag sa Primewater ang panginahanglan sa syudad ug wala usab natuman ang gisaad nga ₱500 milyon nga proyekto sulod sa lima ka tuig.
Apan aron hingpit nga mapahawa ang Primewater gikinahanglan nga musunod kini sa insaktong proseso.
Padayon ang pre-termination notice nga gihatag sa kompaniya sulod sa 90 ka adlaw nga matapos sa Disyembre 22 ug kini mahimong basihan sa final termination sa kontrata.Sa laing bahin posibleng masolbad ang problema sa tubig pinaagi sa dugang linya gikan sa Kulasihan, Imbayao.
Niadtong Martes gisulayan na ang reservoir nga nahimutang sa Barangay San Jose nga makasupply og tubig sa lima ka water tanks ug makahatag serbisyo sa walo ka barangay sama sa San Jose, Laguitas, Cabangahan,Violeta, Aglayan, Casisang, Managok ug Linabo.
Ang maong proyekto adunay budget nga P325 Milyones diin gilauman nga mahimong fully operational ang reservoir sa tuig 2026.
Dugang pa ni Mayor Pabillaran kini nga proyekto importante aron masiguro nga matubag ang panginahanglan sa tubig sa syudad nga dugay nang nag-antos sa kakulang sa supply..