Nagtuo ang Malacañang nga gikinahanglan ang mas lawom ug mas halapad nga imbestigasyon kalabot sa kaso sa mga nawagtang nga sabungero.
Kini human migula ang usa ka intelligence report nga naglakip og impormasyon nga posibleng nalambigit ang pipila ka personalidad nga konektado sa war on drugs sa panahon ni kanhi Presidente Rodrigo Duterte.
Matud ni Palace Press Officer ug Presidential Communications Office (PCO) Undersecretary Claire Castro, gisuportahan ni Presidente Ferdinand Marcos Jr. ang plano nga palapdan pa ang imbestigasyon aron masuta ang tibuok gilapdon sa insidente.
Giklaro ni Castro, nga wala pa silay gitudlo nga sad-an sa pagkakaron, apan mipasalig si Presidente Marcos sa hingpit nga pagpaningkamot aron mahatagan og hustisya ang mga biktima sa maong kaso.