Nagsugod na sa pag-abot sa Middle East ang libo-libong sundalo gikan sa elite 82nd Airborne Division sa U.S. Army, samtang gitun-an ni U.S. President Donald Trump ang sunod nga lakang sa gubat batok sa Iran.
Nasayran nga kining mga sundalo nga gikan sa Fort Bragg sa North Carolina, maoy dugang sa una nang gipadala nga pwersa sa Estados Unidos nga naglakip sa mga Marines, Navy, ug Special Operations units. Niadtong miaging weekend, gibana-bana nga 2,500 ka mga Marines ang niabot usab sa rehiyon.
Sumala sa mga report, ang maong pagpadaghan sa tropa nagpakita sa interes sa US sa pagpahigayon og ground operations. Gani, ang Pentagon nag-andam na og plano alang sa posibleng mga semana nga operasyon sa yuta sulod sa Iran.
Bisan pa man niini, nagpabiling anaa sa pagbuot ni Presidente Trump kon ipatuman ba gayod ang maong plano. Ang pagkaanaay mga sundalo sa yuta makahatag sa US og katakus sa pag-abli pag-usab sa Hormuz canal o pag-ilog sa Kharg Island, nga maoy sentro sa 90% sa oil exports sa Iran.
Sa pikas bahin, ang Iran nipasidaan na nga andam silang mosukol sa bisan unsang ground assault nga buhaton sa Amerika.