Gipaimbestigahan na ni Senador Robinhood Padilla ang gikatahong usa sa iyang kawani ang nasakpan nga naggamit og marijuana samtang anaa sulod sa CR sa Senado.
Matud ni Atty. Rudolf Philip Jurado, chief of staff ni Padilla, nagpaabot pa sila sa incident report ug written explanation gikan sa Office of the Sergeant-at-Arms (OSAA) kalabot sa maong empleyado.
Giklaro usab niini, nga wala siya gipatawag sa OSAA, apan boluntaryong miadto didto aron sa pagkompirma kung ang ilang buhatan ba ang gitumbok sa nahisgutang insidente ug aron makakuha og kopya sa incident report.
Tungod niana, nagpahigayon usab og kaugalingong imbestigasyon ang ilang buhatan kalabot sa maong isyu.
Matud usab ni Sergeant-at-Arms Aplasca, nagpadayon pa ang ilang imbestigasyon ug kung mahuman na, mopasa sila og report ngadto kang Senate President Chiz Escudero.
Samtang gipahigayon usab ang random drug test sa mga empleyado ug kawani sa Senado.