Subling mihangyo ang mga abogado ni kanhi Presidente Rodrigo Duterte sa International Criminal Court (ICC) pre-trial chamber nga aksyonan gilayon ang ilang petition for provisional release, usa ka buwan sa dili pa ang gikatakdang confirmation hearing sa kanhi-Presidente sa The Hague.
Sa usa ka heavily redacted nga dokumento nga gipetsahan niadtong Agosto 19, ang depensa nangatarungan nga kinahanglan nga daling buhian si Duterte sa bisan unsang mga kondisyon nga gitakda sa korte.
Base sa mosyon, posibleng dili motambong si Duterte sa confirmation proceedings, apan kung gikinahanglan, mahimo kini pinaagi sa videoconferencing.
Dugang pa, gipasalig sa depensa nga mahimo usab nga masiguro ang monitoring conditions ug contact restrictions pinaagi sa “redacted”.
Gisaway usab sa abogado ni Duterte nga sii Nicholas Kaufmann, ang posisyon sa Prosekusyon nga ang usa ka ad hoc cooperation agreement kinahanglan alang sa temporaryo nga kagawasan.
Matud niini, usa kini ka ilusyon tungod duha lamang ka nasud ang adunay susamang kasabutan sa ICC.
Giduso sa depensa nga naka-andam na ang “redacted” nga motuman sa tanang kondisyon nga anaa sa Artikulo 4(2) sa Model Agreement sa Interim Release.
Sa miaging buwan, mihangyo usab ang kampo ni Duterte nga i-oktaba sa ICC ang desisyon niini sa ilang petisyon hangtod nga makompleto sa depensa ang tanang gikinahanglang impormasyon.
Kahinumdoman nga si Duterte anaa sa detention facility sa ICC sukad pa kaniadtong tunga-tunga sa Marso human kini gitugyan sa mga otoridad sa Pilipinas ngadto sa international tribunal, base sa hangyo sa Interpol.
Si Duterte, nga mao ang ika-16 nga Presidente sa nasud, nag-atubang og mga kasong crimes against humanity batok sa liboan ka mga pagpamatay ubos sa war-on-drugs, diin lakip niini ang mga menor-de-edad isip biktima.