Gikumpirma ni House of Representatives spokesperson Princess Abante, nga mituman na ang Kapulungan sa direktiba sa Korte Suprema nga magsumite og impormasyon ug mga dokumento nag adunay kalabot sa impeachment batok kang Bise Presidente Sara Duterte.
Ang maong mando sa korte naggikan sa mga petisyon nga gisang-at sa kampo ni VP Sara, nga naghangyo nga hunongon ang impeachment trial batok kaniya.
Matud sa opisyal sa House nga gisumite na sa Office of the Solicitor General (OSG), nga motindog isip legal counsel sa House, ang ilang pleading online pinaagi sa Philippine Judiciary Portal, ug gipaabot usab kini sa tanang mga apektadong partido pinaagi sa electronic service.
Gikatakda usab nga magsumite sila og physical copy sa Korte Suprema pinaagi sa personal nga serbisyo sa umaabot nga Lunes.
Gipasabot ni Atty. Abante nga ang unang tulo ka reklamo batok sa Bise Presidente naapil sa Order of Business sulod sa 10-session-day nga timeline nga gi-mando sa konstitusyon.
Samtang ang ikaupat nga reklamo gisang-at pinaagi sa suporta sa kapin sa one-third sa mga miyembro sa Kamara, ug direkta kining gipadala ngadto sa Senado isip Articles of Impeachment.
Gipasalig usab ni Atty. Abante sa publiko nga ang due process magapadayon alang kang Bise Presidente Sara Duterte sa tibuok proseso sa impeachment trial, aron maprotektahan ang iyang katungod sa pagdepensa ug pagpanghimatuud sa iyang ebidensiya.