Gikumpirma ni House Speaker Faustino “Bojie” Dy nga nangayo na siya og tabang gikan sa Department of Justice (DOJ) aron makanselar ang pasaporte ni kanhing Ako Bicol Party-list Representative Zaldy Co, taliwala sa nagpadayong imbestigasyon kabahin sa iyang kalabutan sa giingong korapsyon sa mga proyekto sa flood control.
Sumala ni Speaker Dy, gilantaw niini nga importante nga mapugngan ang posibilidad nga makabiyahe si Co paingon sa gawas sa nasud.
Dugang pa niini, iyang gipahibalo ang kaniadto nga kalihim sa DOJ nga si Sec. Jesus Crispin Remulla nga karon Ombudsman diin pagkahuman niadtong Septiyembre 29, ang petsa sa pag-resign ni Co, aron hangyoon ang dali nga aksyon kabahin sa hingpit nga pagbantay sa iyang pagbiyahe.
Gipasabot usab ni Dy nga bisan pa man dili direktang sakop sa hurisdiksiyon sa DOJ ang pagkanselar sa pasaporte, nangayo lang siya og tabang gikan sa maong ahensiya gumikan kini maoy nagdumala sa Bureau of Immigration ug makatabang sa mas paspas nga koordinasyon sa ubang mga ahensya.
Tungod niini, gisiguro ni Remulla nga buhaton sa DOJ ang angay nga lakang aron mahatagan og aksyon ang maong hangyo sa labing paspas nga paagi.
Dugang pa, matod ni Dy, ang DOJ misulat na usab sa Department of Foreign Affairs (DFA) aron sila mismo maglihok ug mag-inisyatiba sa pagkanselar sa pasaporte ni Co.