Gisugdan na karon ang pagsumpay sa mga tubo sa tubig sa bag-ong water system nga ginatukod sa Barangay Imbayao ning syudad isip agi og pagtubag sa gideklarang state of calamity sa krisis sa panubig sa syudad.
Sa eksklusibong pakighinabi sa Bombo Radyo Malaybalay kang Konsehal Niko Aldeguer, gibutyag niini nga usa sa giatangan karon makaabag sa maong krisis sa panubig, mao ang bulk water supply sa nahisgutang barangay diin gisugdan na ang pagsumpay sa mga tubo nga anaa sa Barangay Aglayan padulong sa Barangay Linabo, Managok, Bangcud ug uban pang kasikbit nga barangay.
Matud ni Konsehal Aldeguer, gilaoman nga magamit na kini karong umaabot bulan sa tunga-tunga sa hunyo o sa bulan sa hulyo karong tuiga.
Apan, ning kasamtangan, giplano sa syudad ang pagpalit og mga water tanker alang sa pagrasyon og tubig sa katawhan ug disaster response samtang gipaabot ang maong bag-ong water sa Barangay Imbayao.Â