Gikwestiyon sa Duterte Youth party-list ang desisyon sa Commission on Elections (COMELEC) ang pagbabag sa proklamasyon niini isip bag-ong miyembro sa Kongreso.
Ang maong partido nga gipangulohan ni Ronald Cardema, midangop sa Korte Suprema aron mupasaka og petisiyon batok sa suspension sa ilang proklamasyon.
Gisumite ang apela sa maong grupo niadtong Martes, Mayo 20, 2025, ug naghangyo nga ipatuman ang temporaryo nga restraining order batok sa desisyon sa National Board of Canvassers (NBOC) nga nag-suspendi sa ilang proklamasyon.
Sumala kang Cardema, natingala sila sa dihang nakadawat og impormasyon nga dili uban ang ilang partido nga ituboy atol sa maong proklamasyon.
Dugang pa niini, gipahiobalo unta daan sila aron nakapangamdam ug makahimo og lakang apan ulahi na ang tanan sa dihang naabot kanila ang impormasyon diin gituohan niini nga gituyo aron dili sila makaapil sa pagtuboy sa Kongreso.
Ang Duterte Youth, opisyal nga nailhan sa tanyag nga “Duty to Energize the Republic through the Enlightenment of the Youth Sectoral Party-list Organization,” diin usa sa mga nagsuporta sa mga polisiya ni kahi Pangulong Rodrigo Duterte ug sa anak niini nga si Vice President Sara Duterte.
Ang partido gisugdan ni Ronald Cardema niadtong 2016 ug nagsugod og lingkod sa Kongreso niadtong 2019.
Apan, ang ilang pag-apil sa gobyerno ug ang ilang representasyon sa sektor sa kabatan-onan nag-atubang og mga kontrobersiya ug mga kaso batok kanila.
Ang pag-apelar sa Duterte Youth sa Korte Suprema nagpasabot nga ang isyu magpadayon sa legal nga proseso, ug magpadayon ang mga diskusyon bahin sa ilang lehitimong representasyon sa sektor sa kabatan-onan ug ang integridad sa sistema sa party-list sa Pilipinas.