Nasikop ang duha ka indibidwal nangawat og iring sa ukay-ukayan sa Purok 4, Norte, Don Carlos, Bukidnon.
Base sa nakalap nga impormasyon, adunay usa ka babaye nga giilang si Mae Parimba, 30 anyos, ang nanawag sa kapulisan sa Don Carlos ug mireport kabahin sa gikaingong pagpangawat sa ukay-ukayan niini.
Sa pag-abot sa mga otoridad sa lugar, sa inisyal nga imbestigasyon, naila ang mga suspek nga mao sila alyas “Danna” 37 anyos, babaye, ug kauban niining lalaki nga si alyas “Berto” 46 anyos. Gikatahong gikawat sa duha ka suspek ang Persian breed nga iring sa maong ukay-ukayan nga nagkantidad og P10,000.
Sa wala pa ang insidenti, ang maong iring anaa sa prisohan nga nahimutang sulod sa tindahan sa ukay-ukay diin gikawat kini sa mga supek og miikyas sa wala matino nga direksyon.
Apan nasikop gilayon ang mga suspek tungod sa CCTV camera ug gidala sa Don Carlos Municipal Station. Samtang ang narekober usab ang maong gikawat nga iring.