Giinsistir ni Senador Bong Go nga ang kaso nga gisang-at batok kaniya ni kanhing Senador Antonio Trillanes diin usa lamang ka “diversionary tactic” aron ilikay ang atensyon sa publiko gikan sa tinuod nga isyu sa korapsyon sa gobyerno.
Matud ni Go nga angay nga tultulon ang mga tinuod nga nalambigit sa korapsyon ug sa mga ghost projects ubos sa flood control program sa gobyerno.
Sayup nga tawo matud pa ang gipunting ni Trillanes, ug angay lamang kasohan ang tinuod nga mga korap.
Gipasabot usab sa senador nga wala siya magpagamit sa bisan unsang negosyo sa iyang pamilya, ug wala niini gamita ang iyang posisyon aron paboran sila.
Nanawagan si Go sa mga ahensya sa gobyerno, lakip na ang Independent Commission for Infrastructure (ICI), Office of the Ombudsman, ug ang Department of Public Works and Highways (DPWH) , nga tumbokon ang kamatuoran ug magpabilin nga patas, ilabi na sa mga isyu sa gobyerno ug sa mga maanomalyang flood control projects.
Kahinumduman nga misang-at si Trillanes og kaso sa graft ug plunder batok kang Go ug kanhing Presidente Rodrigo Duterte sa Office of the Ombudsman, may kalabotan sa P7 bilyon nga mga proyekto sa imprastruktura sa gobyerno nga gipaboran kuno sa kompaniyang gipanag-iyahan sa amahan ug igsoon ni Go.