Gipadayag na sa publiko ni Presidente Ferdinand “Bongbong” Marcos Jr. ang iyang kinatibuk-ang bahandi nga nagkantidad og P389 milyon base sa iyang Statement of Assets, Liabilities, and Net Worth (SALN) sa Disyembre 31, 2024.
Apan base sa appraisal sa pribadong kompanya nga Cuervo Appraiser Inc., mas taas ang iyang net worth nga mitungas og P1.375 bilyon. Nagpasabot kini nga ang P389.57 milyon gisunod sa giya sa Civil Service Commission sa pag-file sa SALN, samtang ang P1.375 bilyon gikan sa kantidad nga gi-appraise sa Cuervo.
Ang assets sa presidente naglakip og P142.026 milyon sa 21 ka real estate properties, lakip na ang agricultural ug residential land, ug personal nga mga propidad nga nagkantidad og P247.332 milyon.
Lakip sa personal nga mga asset ni Marcos Jr. ang P38.7 milyon nga cash, P134.192 milyon nga investment, mga alahas, 12 ka sakyanan, ug 126 ka mga painting gikan sa mga bantugang artista diin ang labing mahal niini nagkantidad og P19 milyon.
dugang sa iyang mga sakyanan ang Mercedez-Benz Maybach nga nagkantidad og P10.5 milyon. Wala usab siyay gideklarar nga bisan unsang utang sa iyang 2024 SALN, ingon man sa iyang mga deklarasyon sukad pa niadtong Hunyo 2022.
Samtang si Vice President Sara Duterte, misaka ang gideklarang net worth sukad milingkod sa ikaduhang labing taas nga posisyon sa nasud gikan sa P71.058 milyon niadtong Hunyo 2022 ngadto na sa P88,512,370.22 sa Disyembre 31, 2024. Base kini sa mga kopya sa Statements of Assets, Liabilities, and Net Worth ni Duterte nga gisumite gikan Hunyo 30, 2022, hangtod Disyembre 31, 2024.
Sa pagsulod niini sa puwesto kaniadtong Hunyo 30, 2022, gireport ang net worth niini nga P71,058,841.
Ang real properties nilang magtiayon nga si Manases Carpio ug ilang mga anak mibalor og P50,958,891, samtang ang personal properties sama sa mga sakyanan ug ubang butang anaa sa P23,849,950.