Nagpabilin ang gikusgon sa Bagyong Verbena samtang naglihok sa Negros Island Region. Base sa Philippine Atmospheric, Geophysical and Astronomical Services Administration (PAGASA), namatikdan ang sentro niini sa kadagatan duol sa Pinamungahan, Cebu, nga nagdala gihapon og kusog nga hangin nga moabot sa 55 kph ug paghapak nga 90 kph.
Tungod niini, nagpabilin ang Typhoon Signal No. 1 sa daghang lugar lakip ang Occidental ug Oriental Mindoro, Romblon, pipila ka bahin sa Palawan lakip ang Calamian, Cuyo ug Cagayancillo Islands, daghang lungsod sa Masbate, ingon man sa Antique, Aklan, Capiz, Iloilo, Guimaras, Negros Occidental, Negros Oriental, Siquijor, Cebu, Bohol, Samar, Eastern Samar, Biliran, Leyte, Southern Leyte, Dinagat Islands, Surigao del Norte, pipila ka lugar sa Surigao del Sur, Agusan del Norte, Agusan del Sur, Camiguin, Misamis Oriental, Misamis Occidental ug Zamboanga del Norte.
Sa Western Visayas, gipasaka na sa red alert status ang rehiyon tungod sa padayon sa kakusog nga ulan, ug bisan walay gilauman nga storm surge, nagpahimangno ang OCD-6 nga posibleng mosaka ang tubig-dagat ug makapahinabo og coastal flooding kung magsabay ang high tide ug grabe nga pag-ulan.
Bisan tropical depression lamang ang Verbena, matud sa ahensya nga delikado gihapon ang kadaghan sa ulan nga makapahinabo og pagbaha ug pagdahili sa yuta, hinungdan nga gipaandam ang publiko sa pag-alerto.
Naka-standby na ang Search and Rescue teams nga giunhan sa 3rd Infantry Division Philippine Army uban ang Coast Guard, BFP, ug PNP aron dali makatubag sa emerhensya, samtang gisuspinde ang klase karong adlawa sa Iloilo City ug kadaghanan sa mga munisipyo sa rehiyon.