Babaye patay human gipusil sa live-in partner sa Bukidnon

Patay ang 24 anyos nga babaye nga giilang alyas “Akang” human gipusil sa agtang sa iyang live-in partner sulod sa ilang panimalay sa Purok 9, Quimtras, Barangay Butong, Quezon, Bukidnon, niadtong Oktubre 24.

Base sa imbestigasyon, naglalis ang mag-live-in sa wala pa madungog ang buto sa armas gikan sa ilang kwarto. Nakaplagan sa amahan sa suspek ang biktima nga nagkadugo ug may samad pinusilan sa agtang.

Nadakpan ang suspek human sa hot pursuit operation sa kapulisan sa Quezon Municipal Police Station, sa koordinasyon sa mga opisyal sa Barangay Butong.

Narekober sa crime scene ang duha ka bala nga gituohang gikan sa kalibre .38 nga pistola. Naa na sa kustodiya sa kapulisan ang suspek samtang giandam ang kasong homicide batok kaniya.