Miabot na sa 30 ka miyembro sa gabinete ang nagsumite og courtesy resignation human nagmando ang pangulo nga magsumite og courtesy resignation ang tanang kalihim sa kagamhanan human kini gianunsyo sa palasyo kaganinang buntag, karong adlawa.
Lakip sa mga misanong ang pipila ka mga kalihim sa gabinete nga mosumite sa ilang courtesy resignation subay sa mando ni Presidente Ferdinand “Bongbong” Marcos Jr., nga “irekalibra” ang administrasyon human sa Eleksyon 2025 midterm polls.
Gipangunahan kini ni Interior Secretary Jonvic Remulla, diin misumite kini sa iyang resignation isip pagtugot nga nagserbisyo ubos sa kabubut-on sa Presidente.
Lakip si Rex Gatchalian, Social Welfare Secretary, nga nagkanayon nga mosumite sa iyang resignation ning buntaga.
Si Henry Aguda, Information and Communications Technology Secretary, mibutyag usab nga mutuman siya sa mando sa presidente.
Ang Budget Secretary nga si Amenah Pangandaman, misumite usab sa iyang resignation isip suporta sa tanang desisyon sa President ug giisip nga alang kini sa kaayohan sa katawhang Pilipino.
Lakip niini si Vince Dizon, Transportation Secretary; si Romando Artes, Metropolitan Manila Development Authority Chairman; Ralph Recto, Finance Secretary ; Bienvenido Laguesma, Labor Secretary;Secretary Jaybee Ruiz, Presidential Communications ug Menardo Guevarra, Solicitor General. Miapas usab niini sila DOT Sec. Cristina Frasco; DMW Sec. Hans Leo Cacdac; DOJ Sec. Jesus Crispin Remulla; DA Sec. Francisco Tiu Laurel, Junior; TESDA Dir. Gen. Jose Benitez; DepDEV Sec. Arsenio Balisacan; Presidential Adviser for Investments and Economic Affairs Sec. Frederick Go; Executive Secretary Lucas Bersamin.
Sa usa ka pamahayag, miingon si Marcos nga ang desisyon dili mahitungod o naglambigit sa negosyo. Apan, sumala sa Presidente nga nagpagawas ang katawhan sa ilang tingog, ug resulta matud pa ang gipangita ug dili politika. Dugang pa niini, nga nadungog sa presidente ang mulo sa katawhan, ug ginahatagan kini niya og aksiyon.
Sa kasamtangan, padayon pang ginahulat sa kagamahanan ang uban pang miyembro og makumpleto aron pagasugdan naang mga lakang nga pagahimuon sa pangulo.