Gilauman sa Department of Justice (DOJ) nga mukabat sa ₱1.5 bilyon ang kinatibuk-ang kantidad nga i-uli sa mga state witnesses nga nalambigit sa giingong anomalya sa mga flood control projects sa nasud.
Matud ni Justice Usec. Nicolas Felix Ty, kini base sa kasabutan ubos sa Witness Protection Program (WPP) tali sa gobyerno ug sa upat ka mga state witnesses. Giila ang maong mga testigo nga sila si kanhi DPWH Undersecretary Roberto Bernardo, Henry Alcantara, Gerard Opolencia ug ang contractor nga si Sally Santos.
Gibutyag ni Ty nga sa maong kantidad, ₱1 bilyon ang gikan ni Bernardo diin niadtong Martes, nag-turn over na si Bernardo og ₱35 milyones isip down payment sa inisyal nga ₱150 milyones nga restitution gikan sa iyang mga nabaligya nga kabtangan.
Gibutyag sab ni Justice Sec. Fredderick A. Vida nga kasamtangan, mikabat na sa ₱316,381,500 ang kinatibuk-ang kantidad nga nakolekta sa gobyerno.Giseguro ni Sec. Vida nga ang tanang kwarta nga na-uli dunay resibo ug diretso nga gidala sa Bureau of the Treasury.
Saysay pa niini ang pag-uli sa kwarta timaan sa “good faith” sa mga testigo kinsa miangkon nga nakuha ang maong kantidad sa ilegal nga paagi.
Gawas sa kwarta, dako sab og tabang ang mga ebidensya nga gihatag sa mga state witnesses aron mapalig-on ang mga kaso nga isaka batok sa uban pang mga sad-an. Gilauman nga madugangan pa ang maong kantidad sa mosunod nga mga adlaw samtang nagpadayon ang proseso sa korte.