Gisulayan na sa syudad sa Malaybalay ang water project sa Barangay San Jose aron mahibal-an kung andam na ba kini mosuplay ug tubig ngadto sa komunidad apil na ang pag-verify kung operational na ba ang mga pipelines nga gigamit sa maong proyekto.
Matud pa ni Malaybalay City Mayor Jay Warren Pabillaran lima (5) ka water tanks nga adunay pondong tubig ang posibleng makasuplay sa pipila ka barangay sama sa Barangay Laguitas ug Aglayan.
Apan gipadayag sa Mayor nga dili pa gyud angay imnon ang tubig alang sa publiko kay wala pa kini miagi sa water treatment hinungdan nga limitado pa ang paggamit niini.
Gilauman nga mahimong fully operational ang reservoir sa tuig 2026 human sa pagtugot sa national government sa ₱75 milyon nga budget alang sa pagpalambo sa patubig sa syudad nga dugay nang nagantos sa problema sa supply sa tubig.
Dugang pa sa Mayor, ang proyekto tinguha nga mahimong Level 3 water facility, diin ang tubig derecho na isupply sa mga kabalayan sa nahisgutang mga barangay sa dihang makompleto ang tanang pasilidad.