Nagpabiling blangko ang kapulisan sa motibo sa pagpamusil-patay sa usa ka barangay tanod sa Barangay Iba, Cabanglasan, Bukidnon, bisan pa sa pagkadakop sa usa sa mga giingong responsable atol sa gipahigayon nga hot pursuit operation niadtong Hulyo 21.
Kahinumduman, nadakpan ang suspetsado samtang nagsakay og motorsiklo sa Sitio Warag, Purok-8, sa maong barangay, uban sa tanod ug kapulisan, sa samang adlaw nga nahitabo ang krimen.
Sa pakighinabi sa Bombo Radyo Malaybalay, gibutyag ni PMaj. Jayvee Babaan, tagpamaba sa Bukidnon Police Provincial Office, nga posible nga namaligya lang og sigarilyo ang suspetsado, human Nakit-an ang sigarilyo sa iyang bag sa panahon sa insidente.
Nasayran usab nga nagdangoyngoy ang suspetsado sa dihang nasikop ug gipanghimakak ang iyang kalambigitan sa krimen. Padayon ang imbestigasyon sa mga otoridad aron masuta ang tinuod nga motibo sa krimen ug mahatagan og hustisya ang tanod nga namatay.