Subling magpahigayon ang Commission on Elections (COMELEC) sa nationwide voter’s registration sugod Oktubre 20, 2025 hangtod Mayo 18, 2026 alang sa eleksyon sa Sangguniang Kabataan sa Nobyembre 2026.
Sa pakighinabi sa Bombo Radyo Malaybalay, si Atty. Danilo Dividina, Election Officer sa COMELEC-Malaybalay City, matud pa niini pito ka bulan nga rehistrasyon aron hatagan higayon ang mga kwalipikadong botante nga maparehistro.
Gipasabot usab nga ang mga batan-ong 15 anyos sa adlaw sa eleksyon mahimong rehistradong Sangguniang Kabataan (SK) voters, ug ang 18 anyos pataas mahimong regular voters alang sa lokal ug nasyonal nga piniliay.
Giawhag usab ni Dividina, ang mga kabatan-onan ug katawhan nga magpahimulos sa maong oportunidad, tungod ang rehistrasyon maoy unang lakang sa paglahutay sa demokrasya ug pagpili sa husto nga mga lider.
Gihatagan usab niini og gibug-aton ang pagkamahinungdanon sa aktibong partisipasyon sa eleksyon, aron makisayod ug responsable nga botante ang tanan.
Ang rehistrasyon buhaton sa tanang COMELEC offices sa tibuok nasud, lakip na ang mga satellite registration centers sa pipila ka barangay, eskwelahan, ug malls aron mas mapadali ang proseso.
Gipahinumduman usab ang publiko nga kinahanglan magdala sa valid ID ug personal nga impormasyon sa pagparehistro.Â