Samaran ang usa ka indibidwal human nga nagbangga ang usa ka Toyota Hilux ug usa ka motor. Ang aksidente nahitabo sa Purok 6, Barangay Laguitas, Malaybalay City, Bukidnon, Mayo 16, 2025, bandang 10:30 kaganinang buntag.
Subay sa record, ang Toyota Hilux nga adunay plate number DAG9599, gipanag-iyahan ug gimanehuan ni alyas Kim, 26 anyos, taga Casisang, Malaybalay City, Bukidnon.
Samtang, ang motor nga nalambigit sa maong insidente gimanehuan ni John Vincent Ganadillo Estillore, 29 anyos, taga Purok 5, Tongantongan, Valencia City, Bukidnon.
Sa nahimong ekslusibong pakighinabi sa Bombo Radyo Malaybalay sa drayber sa Toyota Hilux, nanukad matud pa sila sa sentro sa Malaybalay ug nag-U-turn paingon matud pa sa siyudad, apan sa wala damhang panghitabo, kusog ang padagan sa motorsiklo nga nagsunod matud pa kanila ug nanubay sab sa susamang direksyon nga maoy hinungdan sa disgrasya.
Gumikan sa maong panghitabo, nakahiagom og samad ang drayber sa motor rason na gilayon kining gidala sa balay tambalanan.
Sa karon, ang drayber sa hilux anaa na sa kustodiya sa kapulisan alang sa mas lawom nga imbestigasyon lakip na ang motor nga nalambigit sa maong disgrasya.