Gipalig-on sa kapulisan sa Bukidnon ang kampanya batok sa iligal nga droga, human madakpi sa sunod-sunod nga operasyon ang unom ka indibidwal sa lain-laing lungsod sa probinsya sa Bukidnon. Ang operasyon nagpakita sa padayon nga determinasyon sa mga awtoridad sa pagpugong sa kriminalidad ug pagpanalipod sa katawhan.
Gisiguro sa Bukidnon Police Provincial Office (BukPPO), sa gipahigayon nga mga operasyon kaniadtong Oktubre 3 ug 4, 2025 sa koordinasyon sa mga lokal nga police stations ug mga espesyal nga yunit sa rehiyon. Sa Kadingilan, nasikop sa buy-bust operation ang 32-anyos nga lalaki nga nailhan sa alyas “Roger.” Nakuhaan kini og upat ka pakete nga gituohang shabu nga adunay timbang nga 0.3679 gramo na nagkantidad sa Php2,501.
Nasikop usab sa Kibawe ang 25-anyos nga lalaki nga bag-ong nailhan nga drug personality, diin nakuhaan og pito ka pakete sa gituohang shabu nga may kantidad nga Php4,760. Sa Kalilangan, duha ka lalaki ang nasikop sa buy-bust operation nga adunay gibug-atong nga tulo ka gramo nga shabu, na nagkantidad sa Php20,400.
Samtang sa Malitbog, duha usab ka lalaki ang nasikop sa operasyon nga nagresulta sa pagkumpiska sa 1.5 gramo nga shabu nga nagkantidad sa Php10,200. Sa Malaybalay City, usa ka 48-anyos nga lalaki ang nadakpan sa Barangay Sumpong, diin nakuhaan kini og 5.074 gramo sa gituohang shabu nga may standard drug price nga Php34,503.
Ang tanang nasikop lakip ang nakuha nga ebidensya gidala sa tagsa-tagsa ka estasyon sa kapulisan alang sa tukmang dokumentasyon ug disposasyon