Gidepensahan ni U.S. President Donald Trump si Israeli Prime Minister Benjamin Netanyahu human kining gisaway.
Matod ni Trump, “terrible” ug dili makatarungan ang panglantaw nila kang Netanyahu nga giila niini isip usa ka “War Hero” ug lider nga dako ang kontribusyon sa relasyon sa Israel ug Estados Unidos, lakip na sa pakigbatok sa hulga nga dala sa Iran.
Sa usa ka post, gibutyag ni Trump nga ang kaso batok kang Netanyahu makapahasol sa iyang negosasyon sa Hamas, nga adunay kalabutan sa pagpabalik sa mga hostages.
Gikondena usab niini ang padayong pagsaway sa Prime Minister taliwala sa seryoso nga mga isyu sama sa seguridad sa nasud.
Gisaway usab ni Trump ang mga akusasyon kang Netanyahu, sama sa pagdawat og mga mahalon nga butang gikan sa mga negosyante bugti sa ilang pabor sa politika.
Samtang padayong gibarugan ni Netanyahu ang iyang pagka-inosente ug gihimakak ang mga pasangil batok kaniya. Kahinumduman nga nagsugod ang pagbatikos kang Netanyahu niadtong 2020 gumikan sa mga kasong bribery, fraud, ug breach of trust.