Gipirmahan ni US President Donald Trump ang usa ka bag-ong travel ban aron maprotektahan ang America gikan sa mga delikadong langyaw.
Sa maong mando, gidili ang pagsulod sa mga langyaw gikan sa 12 ka nasod, lakip na ang Afghanistan, Burma, Chad, Republic of the Congo, Equatorial Guinea, Eritrea, Haiti, Iran, Libya, Somalia, Sudan, ug Yemen.
Ang maong desisyon may kalabutan sa usa ka teroristang pag-atake nga nahitabo sa usa ka Jewish protest sa Boulder, Colorado, diin gibasol sa mga awtoridad ang usa ka lalaki nga ilegal nga nagpuyo sa Estados Unidos.
Sumala ni Trump, ang maong insidente nagpamatood sa peligroso ang mga langyaw nga mosulod sa ilang nasod,hinungdan nga gikinahanglan ang pagpalig-on sa seguridad.
Giila sa FBI ang suspetsado nga si Mohamed Sabry Soliman, usa ka 45-anyos nga lalaki nga migamit og bomba aron sunugon ang mga demonstrador, nga misangpot sa pagka angol sa walo ka tao. Nagpadayon ang imbestigasyon sa mga otoridad sa maong hitabo isip usa ka targeted terror attack, samtang ang White House misalig nga ang bag-ong travel ban usa ka lakang aron mapadayon ang kaluwasan sa mga katawhan.