Gipatuman sa kagamhanang lokal ang terminasyon sa kontrata sa Prime Water, tungod sa padayong non-compliance ug kapakyasan sa paghatag og kalidad nga serbisyo sa tubig sa publiko.
Sa pakighinabi sa Bombo Radyo Malaybalay kay City Councilor Atty. Rendon Sangalang, gipahibalo niini ang publiko nga ang kontrata sa Prime Water posibleng i- terminate sa Disyembre 15. Gikompirma nga ang Malaybalay City Water District na mismo ang mugunit sa water sources, isip paagi aron masiguro ang kalidad ug kontrol sa serbisyo sa panubig ning dakbayan.
Samtang nag-atubang sa krisis sa tubig, gipunting usab sa Konseho ang pag-atiman sa mga tigulang. Giduso ni Sangalang nga ang supplemental financial assistance ihatag na sa mga senior citizen nga 80 anyos pataas, isip amendment sa Ordinance No. 981.
Aron mapadali ang pag-ila ug paghatod sa benepisyo ngadto sa senior citizens ug PWDs, iyang gisugyot ang pagpatuman sa M Citizen ID (Malaybalay Citizen ID) nga nakapasar na sa first reading.