Nagpabiling lig-on ang sistemang pinansyal sa Pilipinas luyo sa mga hagit sa geopolitical ug mga kausaban sa mga polisiya, sumala sa Financial Stability Coordination Council (FSCC).
Ang maong pamahayag gipagawas human sa pagpagula sa inter-agency sa ilahang report alang sa 2024 Financial Stability Report (FSR) kagahapong adlawa.
Ang Financial Stability Coordination Council usa ka inter-agency council nga gilangkuban sa Bangko Sentral ng Pilipinas (BSP), Department of Finance (DOF), Insurance Commission (IC), Philippine Deposit Insurance Corporation (PDIC), ug Securities and Exchange Commission (SEC).
Sumala pa sa Financial Stability Coordination Council, ang kasamtangang kalig-on sa sistema sa pinansyal sa nasud tungod sa nagapadayon nga pagkunhod sa inflation, lig-on nga pag-uswag sa ekonomiya, ug kusog nga international reserves sa nasud.
Gibutyag usab sa council nga ang mga lokal nga bangko adunay taas nga capital buffers ug igo nga liquidity nga nagahatag og katakos sa sistema sa pinansyal sa pag-atubang sa potensyal nga pagkalugi ug pagsuporta sa ekonomiya.
Gibutyag usab sa report nga walay mga timailhan sa dagkong kalainan sa presyo sa mga kabtangan sa financial markets, ug adunay lig-on nga partisipasyon ang nasud gikan sa mga domestic investor.