Gipadayag ni Senador Panfilo “Ping” Lacson ang iyang kasuko ug gipahilom ang mga indibidwal nga matod pa niya nagasamok ug nagmaniobra sa nagpadayong Senate investigation sa flood control scandal.
Atol sa Senate Blue Ribbon Committee hearing karong adlawa, Enero 19, mipagawas si Lacson og hait nga pamahayag batok sa mga grupo nga giingong nagsamoksamok sa proseso ug naggamit sa imbestigasyon alang sa kaugalingong interes. “Shut the f*** up,” matod niya, isip pahimangno sa mga nagpaliko sa kamatuoran ug nagdaot sa integridad sa Senado.
Gihatagan og gibug-aton ni Lacson nga ang tumong sa imbestigasyon mao ang pagpangita sa kamatuoran sa giingong binilyong pondo sa flood control nga nahanaw, ug dili ang paghimo og kagubot o paglibog sa publiko. Gidugang pa niya nga kinahanglan magmabinantayon ang Senado batok sa mga “hijackers” nga wala motabang sa pagkab-ot sa hustisya.