Subling ablihan sa Senado ang imbestigasyon kalabot sa korapsyon sa flood control scandal karong Lunes, Enero 19, sa ala una sa hapon.
Ubos sa motu proprio authority sa Senate Blue Ribbon Committee, ipadayon ang hearing bisan naka-break ang Kongreso aron masubay ang tanang kontrobersyal nga dokumento, ilabi na ang giilang “Cabral files”.
Matud ni Senate President Vicente Sotto III, nagpagula na kini og subpoena ngadto sa Department of Public Works and Highways (DPWH) alang sa mga opisyal nga dokumento nga gikinahanglan sa imbestigasyon.Gikumpirma usab ni Senator Panfilo “Ping” Lacson, ang chairperson sa komite, nga duna na silay gihuptan nga kopya sa maong mga files sa wala pa ang desisyon nga ablihan og usab ang kaso.
Sumala sa taho, dose (12) ka subpoena ang gipirmahan ni Sotto alang sa musunod nga mga personalidad:Kanhi DPWH Secretary Manuel Bonoan, Kanhi Rep. Zaldy Co, Kanhi DepEd Usec. Trygve Olaivar, Kanhi COA Commissioner Mario Lipana, Kanhi DPWH Director Gerardo Polencia, Director Gerard Pacanan, Negosyanteng si Maynard Ng, Kanhi Marine Sgt. Orly Gotesa, Jean Paul Estrada, Mark Texai, RJ Domasig ug Carlene Yap Villa.
Kasamtangan si Bonoan ug Co gikumpirmang anaa sa gawas sa nasud, samtang wala pay kumpirmasyon kon mutambong ba ang laing napulo (10) ka mga indibidwal nga gipadad-an og subpoena alang sa maong hearing.