Bukas ang Malacañang sa sugyot nga gipasiugda ni House Majority Leader Sandro Marcos nga maghatag og libre nga kuryente sa mga pamilyang gamay ra ang konsumo.
Sumala ni Palace Press Officer USec. Claire Castro, kasamtangang ipatuman sa administrasyon ang libre nga kuryente para sa mga benepisyaryo sa 4Ps nga dili molapas sa 50 kilowatt-hour ang konsumo.
Gipasiguro usab ni USec. Castro nga pagatuki-on pa ang mga probisyon sa sugyot balaod aron mahibal-an ang epekto niini, lakip na kung kinsa ang mopatigbabaw sa gasto kon maipatuman.
Dugang pa niini nga posible kini makatabang sa mga katawhan nga gamay ra ang konsumo sa kuryente ug maka-awhag sa mas maampingong paggamit sa elektrisidad, apan kinahanglan pa kini nga masusi pag-ayo sa dili pa suportahan sa administrasyon.