Gikumpirma sa hepe sa Philippine National Police (PNP) nga si PGen. Nicolas Torre III, nga ubos na sa ilang protective custody si alyas “Totoy,” kinsa nahimong whistleblower sa mga nawala nga sabungero.
Matud usab niini, nga kasamtangang nag-apply na si Alyas “Totoy” sa Witness Protection Program aron masiguro ang seguridad niini samtang anaa ilawom sa proteksyon sa kapilisan.
Gibutyag usab ni Torre nga hagbay na si alyas Totoy sa ilang buhatan uaban ang mga pamahayag niini mahitungod sa kamatayon ug kahimtang sa mga nahanaw nga sabungero.
Dugang pa sa hepe nga gilantaw pag-ayo sa ilang buhatan ang isyu ug dili nila tugutan mabulilyaso ang kaso.
Samtang gipasabot sa hepe nga mahinungdanon ang maong pag-amping sa mga testigo ug mga “leads” gumikan dili lamang sa Taal nahimutang ang mga patayng lawas sa mga biktima, apan anaa pa sa ubang dapit o lugar.