Gitutokan karon sa Police Regional Office 10 kon PRO10 ang tanang lakang sa seguridad alang sa gikatakdang rally sa Iglesia Ni Cristo niining adlawa Nobyembre 16 hangtod 18, 2025, pinaagi sa hugot nga pagpangandam ug koordinasyon sa tanang yunit sa kapulisan sa rehiyon.
Sa pamahayag sa PNP, gikatahong andam na ang pwersa sa kapulisan sa paghatag og hapsay ug luwas nga pagdumala sa maong kalihokan, subay sa ilang mandato nga protektahan ang kalinaw, kahapsay, ug kahimtang sa katawhan.
Matud pa sa buhatan, ang tanang lakang gitutokan aron masiguro nga walay hulga sa seguridad sa tibuok tulo ka adlaw nga rally.
Gipangunahan kini ni PBGEn. Christopher N. Abrahano, Regional Director sa PRO10, sa pagdeklara sa PNP headquarters sa full alert status.
Kabahin kini sa mas lapad nga security preparations alang sa nationwide peaceful rally sa INC ug uban pang grupo, diin gipaabot ang daghang partisipante sa nagkalain-laing bahin sa nasud.
Lakip sa preparasyon ang pagpangandam sa personnel deployment, situational monitoring, crowd control measures, ug close coordination sa lain-laing ahensya sa gobyerno.
Gipasalig sa PRO10 nga ang tanang PPOs, CPOs, ug mobile forces sa Northern Mindanao nagpabiling fully coordinated ug andam sa paghatag og seamless support aron masiguro ang kaluwasan ug seguridad sa publiko sa tibuok panahon sa kalihokan.
Ang PRO10 nag-awhag usab sa katawhan nga makigtambayayong, sundon ang gi-issue nga guidelines sa seguridad, ug likayan ang pagpakatap og dili beripikadong impormasyon aron malikayan ang kalibog sa panahon sa rally.