Gipasabot ni PMaj. Joann Navarro, tigpamaba sa Police Regional Office 10, sa pakighinabi sa Bombo Radyo Malaybalay nga daghang opisina ang mamahimong kadangpan sa katawhan og dunay reklamo batok sa mga pulis ilawom sa han-ay sa kapulisan.
Giila ni Navarro ang mga ahensya sama sa Regional Investigation and Detection Management Division, Regional Internal Affairs Service, People’s Law Enforcement Board sa mga lokal nga panggamhanan, NAPOLCOM, ug Office of the Ombudsman nga andam modawat ug motuki sa mga reklamo.
Nagpasabot kini nga taas ang otoridad nga gihatag sa mga kapulisan, apan kauban usab niini ang taas nga lebel sa accountability aron maprotektahan ang kredibilidad sa organisasyon.
Sumala ni Navarro, ang PRO 10 maglusad gihapon ug kaugalingong imbestigasyon og dunay insidente nga nalambigit ang usa ka miyembro sa kapulisan.
Sa higayong mapamatud-an nga dunay kalapasan, ang PRO 10 mismo ang magpasaka og kaso batok sa suspetsadong pulis.
Dugang pa ni Navarro, nga padayon ang internal cleansing program sa PNP, diin nagpamatuod nga dunay mga kapulisan na nga natangtang sa serbisyo tungod sa ilang kalapasan.