Gipangutana karon sa publiko ang kalinaw sa plano sa pagdumala sa suplay sa tubig sa dakbayan sa Malaybalay human nga giaprubahan sa Sangguniang Panlungsod ang resolusyon nga naghatag og interposing of no objection sa Hanabana Construction and Equipment Corporation aron magdumala sa Level III Water System sa siyudad.
Sumala ni Engr. Nolito S. Binahon, manager sa Malaybalay City Water District (MCWD), atol sa pakighinabi sa Bombo Radyo Malaybalay, wala pa kini igong kasayuran sa maong plano, apan gipasabot niini nga andam ang ilang buhatan nga mosalmot sa mga negosasyon tali sa PrimeWater ug Hanabana Construction kon kini makatabang sa pagpalig-on sa serbisyo sa tubig sa dakbayan. Dugang pa ni Binahon, abri ang MWD sa posibilidad sa partnership o joint efforts aron masiguro nga ang tanang barangay sa siyudad adunay kasaligan nga suplay sa tubig.
Kahinumduman nga sa milabay’ng adlaw sa pakighinabi usab sa Bombo Radyo Malaybalay, gipasabot ni Ramonito N. Sagocsoc, bise-presidente usab sa Hanabana Construction and Equipment Corporation, nga P200 milyon ang inisyal nga pondo nga giandam sa kompanya aron matabangan sa pagsulbad sa dugay nang problema sa panubig sa siyudad.
Giangkon usab niini nga ang kakulangan sa imprastruktura ug pasilidad, dili ang water source, kundili ang nagpadayon nga hagit sa suplay, ug ang plano nilang motabang sa serbisyo sa PrimeWater pinaagi sa independente nga distribution network.
Sa pagkakaron, nagpabilin nga naghulat og klarong koordinasyon ang Malaybalay City Water District, samtang ang publiko nagpaabot sa konkretong lakang aron masiguro ang limpyo, lig-on, ug patas nga serbisyo sa tubig sa siyudad.